NB744

स-साना ति थोपाहरु सिशा कोर्दै केही बयान गर्न खोज्दै छन्,

निहुरिएको म एकटकले तिनै थोपामा हराँउछु

एकार्कामा समाहित हुँदै बग्दा,पछाडिको दृश्य बद्लिदै छ

बिच-बिचमा ठुला थोपा आत्तिदै झर्दै छन्, सँगैका सानालाई आफुसँगै तान्दै

षड्यन्त्रकारी हावा त्यहिबेला सरर्र बहिदिन्छ

झिम्किएका मेरा परेला सँगै

ति थोपा केही तल पुगेर थेचारिन्छन्

असाह्य र लाचार

बिस्तारै बिलिन हुँदै गरेका ति थोपा,

रुँदै बिदा मागेझै गर्छन्,

टाउको उठाएर एकचोटि फेरी म ति थोपा हिंडेका बाटो हेर्छु

सफा र सालीन, त्यहाँ एउटा नयाँ दृश्य देख्छु